Kata Pasambahan Minangkabau

KATO PASAMBAHAN

Sairiang balam jo barabah

Barabah lalu barabah mandi

Saiiriang salam sarato sambah

Sambah lalu salam kumbali

Takalo ambo ka marambah

Diladang urang koto marapak

Baringin patah tatipo

Takalo ambo ka manyambah

Lah tasuruah jo niniak mamak

Dihadapan kito basamo

Sapuluah jari nan kami susun
Ampun jo maaf ka urang banyak
Aka kurang pandapek balun
Manggigia badan dibaok tagak

Ramo-ramo tabang malayang
Malayang ka koto tangah
Indah carano alang kapalang
Lah tibo di tangah-tangah
Tibo di lingkuang urang nan rapek
Buruang sinurak buruang sinuri
Manari-nari diateh pamatang
Siriah galak pinang manari
Mancaliak carano nan lah datang

Pinang sadidi mintak digatok

Siriah sacabiak mintak dikunyah

Sambiakan rokok pamenan tangan
Tarantang tali dibawah janjang
Elok diambiak pangabek sikek
Kok dirantang namuah panjang
Elok dipunta nak nyo singkek
Putiah kapeh dapek diliek
putiah hati bakaadaan

sakian sambah dari ambo
Assalammualaikum warahmatulahi wabarakatu,.